Форумның негізгі тақырыбы – қазақ тілінің этносаралық қатынастарды нығайтудағы және қазақстандық қоғамның бірлігін қамтамасыз етудегі біріктіруші рөлі. Іс-шараға қоғам қайраткерлері, Қазақстан Халық Кеңесінің мүшелері, этномәдени бірлестіктердің, білім беру, денсаулық сақтау және құқық қорғау органдарының өкілдері, әскери қызметшілер мен жастар қатысты. Форум аясында қазақ тілін меңгеру мүмкіндіктері мен оны күнделікті өмірде қолдану аясын кеңейтуге арналған танымдық көрме ұйымдастырылды. Сонымен қатар Қазақстанның орыс, славян және казак ұйымдары қауымдастығы филиалының этностильдегі бұйымдар көрмесі ұсынылды.
Қарағанды облысының ішкі саясат басқармасының басшысы Нұрлан Рахметуллаұлы Бикенов құттықтау сөз сөйлеп, мемлекеттік тілге құрметпен қараудың, елге қызмет етудің және қоғам игілігі жолында еңбек етудің маңыздылығын атап өтті. Форум барысында Қазақстан Халық Кеңесінің мүшесі, қоғам қайраткері Наталья Григорьевна Дементьева аталған конституциялық органның миссиясы мен қоғам мен билік арасындағы өзара байланысты нығайтудағы рөлі туралы баяндады. «Taldau AI Analytics» талдау орталығының директоры, Президенттік жастар кадр резервінің мүшесі Максим Александрович Споткай Қазақстан Республикасының жаңа Конституциясының негізгі аспектілері мен құқықтық мәдениеттің маңыздылығына тоқталды. Спикерлер өз баяндамаларында құқықтық тәртіп, денсаулық сақтау, білім беру, кәсіпкерлік, мәдениет, патриотизм, ұлттық дәстүрлер, рухани мұра және экология мәселелерін қамтыды. Баяндамалар мемлекеттік тілдің қоғамдық келісім мен жалпыұлттық бірлікті нығайтудағы маңызын айқындады. Форумның мәдени бағдарламасы аясында «Үкілі домбыра» республикалық байқауының жүлдегері, «Согласие» орыс мәдени орталығы қоғамдық қорының мүшесі Жамал Анатольевна Дзюба домбырамен күй орындады. «Сарыарқа – ән мен жырдың мекені» облыстық байқауының жеңімпазы, педагог Әлия Джапарова Қасым Аманжоловтың өлеңдерін оқыды. Қарағанды облысының көкпардан чемпионы Олег Кеплинг ұлттық ат спорты түрлері туралы бейнеролик ұсынды. Сондай-ақ Зиода Әбдікәрімова Бұқар жыраудың философиялық шығармаларының өзбек тіліне аудармаларын таныстырды.
Іс-шара соңында мемлекеттік тілдің дамуына, оның қолданылу аясын кеңейтуге және өңірдегі этносаралық келісімді нығайтуға үлес қосқан азаматтарды алғыс хаттармен марапаттау рәсімі өтті.Форум қорытындысы бойынша қатысушылар мемлекеттік тілдің қоғамдық келісімді нығайтудағы, этносаралық өзара түсіністікті дамытудағы және Қазақстан халқының бірлігін қалыптастырудағы маңызды рөлін атап өтті.