Мемлекет басшысының төрағалығымен Қазақстан халқы Ассамблеясының XXXIV сессиясы өтті. Оған Қарағанды облысының ҚХА делегациясы мен мүшелері қатысты.
Сессияның «Бірлік пен келісім жолындағы 30 жыл» күн тәртібі Ассамблеяның айнымас миссиясын – бейбітшілікке қызмет ету, келісімді нығайту және біртұтас азаматтық бірегейлікті қалыптастыру жолындағы қызметін айқындады.
Президент Қасым-Жомарт Тоқаев өз сөзінде елдің тұрақты дамуының басты шарты ретінде этносаралық келісімнің маңыздылығын атап өтті. Мемлекет басшысы Ассамблеяның этносаралық қатынастар саласындағы мемлекеттік саясатты іске асыру және жалпыұлттық бірлікті нығайту ісінде маңызды рөл атқаратынын айтты.
Сессия барысында Ассамблеяның жұмысындағы негізгі бағыттар талқыланды. Қатысушылар тұрақты этносаралық диалогты дамыту, жастардың ҚХА жобаларына қатысуын кеңейту, сондай-ақ Қазақстанда тұратын барлық этностардың мәдени мұрасын сақтау мен насихаттаудың маңыздылығын атап өтті.
Сессия қорытындысы бойынша этномәдени бірлестіктердің мемлекеттік құрылымдармен өзара іс-қимылын күшейтуге және толеранттылық, бірлік пен жасампаздық құндылықтарын ілгерілетуге бағытталған жаңа жобаларды іске асыруға қатысты бірқатар нақты ұсыныстар әзірленді.
ҚХА-ның XXXIV сессиясы Ассамблея институтын қоғамдық келісімнің тиімді тетігі ретінде дамыту жолындағы маңызды кезең болды. Қазақстан халқы Ассамблеясының мүшелері ел бірлігін нығайтуға және еліміздің одан әрі өркендеуіне бағытталған Мемлекет басшысының стратегиялық бағытын қолдауға дайын.
