2025 жылғы 28 мамырда Қарағанды қаласында «Әлімхан Ермеков мұраларының тарихи маңызы» атты халықаралық ғылыми-тәжірибелік конференция өтті.
Шара Қазақстан халқы Ассамблеясының 30 жылдығы аясында және 31 мамыр – саяси қуғын-сүргін мен ашаршылық құрбандарын еске алу күніне орай ұйымдастырылды.
Конференцияның негізгі мақсаты — Алаш қайраткерлері Әлімхан Ермеков, Темірбек Жүргенов, Дәмеш Ермекова-Жүргенова сынды тұлғалардың өмірі мен еңбектерін жаңаша зерделеу, олардың ұлт тарихындағы рөлін бағамдау.
Жиында архивтік деректерге сүйене отырып, ұлт зиялыларының ғылыми, саяси және рухани мұрасы жан-жақты сарапталды. Конференцияға Президент кеңесшісі Мәлік Нұржанұлы Отарбаев, ҚХА мүшелері, жетекші тарихшылар, алаштанушы ғалымдар, қоғам қайраткерлері мен шетелдік қонақтар мен жастар қатысты.
Конференция жұмысына Қарағанды облысы әкімінің орынбасары да арнайы қатысып, аймақ басшысы Ермағанбет Қабдулаұлы Бөлекпаевтың атынан құттықтау сөз сөйледі. Ол өз сөзінде Алаш арыстарының ел үшін сіңірген еңбегін ерекше атап өтіп, мұндай тағылымды шаралардың жас ұрпақ үшін маңызы зор екенін айтты.
Іс-шара барысында Әлімхан Ермековтің ғылыми мұрасы – «Ұлы математика курсы» еңбегінің тарихи-ғылыми құндылығы жайлы баяндамалар тыңдалып, саяси қуғын-сүргін құрбандарын ақтау жұмыстары аясындағы тың деректер ұсынылды.
Ерекше сәттердің бірі – ұлт қайраткері Әлімхан Ермековтің туған жиені Гаянэ ханымның конференцияға арнайы келуі болды. Сондай-ақ Дәмеш Ермекова-Жүргенованың көзі тірі болған сенімді серігі Жібек Әмірханқызы оның жеке заттарын – алтын сағат пен орамалды облыстық музейге салтанатты түрде табыстады.
Конференция соңында модераторлар мен қатысушылар тарихи әділеттілікті қалпына келтіру, ұлттық жадыны сақтау, жастарды елшіл рухта тәрбиелеу жолында мұндай шаралардың маңызы зор екенін атап өтті.
Бұл конференция – ұлт тарихына құрмет, өткеннен тағылым алып, болашаққа нық қадам басуға бастайтын маңызды қадам.
