Қазақстан халқы Ассамблеясының 30 жылдығын мерекелеу аясында Теміртау қаласында Қарағанды облыстық ҚХА-ның «Бірлікпен гүлденген Сарыарқа» атты көшпелі көрмесі өтті. Іс-шара барысында облыстық Ассамблея мен этномәдени бірлестіктердің бейбітшілік пен келісімді нығайтуға бағытталған қызметі таныстырылды.
Іс-шараға Қарағанды облыстық ҚХА қоғамдық төраға орынбасары, Ақсақалдар кеңесінің мүшесі, Қарағанды облыстық мәслихатының депутаты И.В.Жабяк, Қарағанды облыстық ҚХА-ның Еврей мәдени орталығының төрағасы, Ақсақалдар кеңесінің мүшесі, облыстық ҚХА жанындағы ғылыми-сараптамалық топтың төрағасы В.Б.Молотов-Лучанский, «Джорджия-2007» грузин қоғамдық-мәдени орталығының төрағасы Г.Г.Долидзе, ҚХА жанындағы этномедиация кеңесінің мүшесі Е.К.Ракишев қатысты.
Облыстық ҚХА өкілдері Теміртау қаласының тұрғындарымен кездесіп, қоғамдық келісім мен мәдени әртүрліліктің маңыздылығы туралы пікір алмасты. Көрмеде Қазақстан халқы Ассамблеясының шығармашылық ұжымдары концерттік бағдарлама ұсынды.
Теміртау қаласы – Қарағанды облысының ірі индустриялық және мәдени орталықтарының бірі. Мұнда 30-дан астам этнос өкілдері тұрады. Қалалық этномәдени бірлестіктер, Ассамблея жастары, Аналар және Ақсақалдар кеңестері қоғамдық келісімді нығайту жолында белсенді жұмыс жасауда.
