Нұра ауданына Қазақстан халқы Ассамблеясының 30 жылдығына арналған «Бірлікпен гүлденген Сарыарқа» атты көшпелі көрмесімен Қарағанды облысының ҚХА делегациясы келіп, ерекше кездесу өтті.
Іс-шара барысында Қарағанды облысының этномәдени бірлестіктерінің жетістіктері көрсетілген экспозиция ұсынылды, ол өңірдің дамуына әртүрлі ұлт өкілдерінің қосқан үлесін бейнелейді. Келушілерге Қазақстан халқы Ассамблеясының тарихы мен қызметі, сондай-ақ облыстың маңызды жетістіктері туралы бейнефильм көрсетілді. Іс-шараға А.К.Киясова — облыстық ҚХА Аналар кеңесінің төрайымы, З.Х.Шалабаева —Аналар кеңесінің мүшесі, В.А.Хмелевский – облыстық «Полония» поляк қоғамының басшысы, Н.С.Еременко – Т.Г.Шевченко атындағы «Рідне слово» украин тілі қоғамының басшысы қатысты.
Қатысушылар аудан жұртшылығымен кездесіп, шараның маңыздылығын атап өтті. Олар еліміздегі ұлтаралық келісім мен достықтың берік негізін насихаттап, бұл көрменің өңірдегі рухани бірлікті арттыратынын айтты.
Шараның мәдени бағдарламасын этномәдени бірлестіктердің шығармашылық ұжымдары мен жеке орындаушылары жалғастырды. Көрме мен концерттік бағдарлама — Қазақстанда бір шаңырақ астында өмір сүріп жатқан халықтардың мәдени әралуандығы мен бірлігінің жарқын символына айналды. Іс-шара еліміздің бейбітшілігіне, келісімі мен одан әрі өркендеуіне арналған ізгі тілектермен аяқталды.
