Қарағанды облысының Достық үйінде «Мәдениетті ана – мәдениетті ұлт» және “Елдесу және татуласу” жобасы аясында «Инклюзивті университет: жастар арасында гендерлік теңдік туралы тұрақты түсініктерді тәрбиелеу және қалыптастыру мәселелері» тақырыбында дөңгелек үстел өтті. Дөңгелек үстел жұмысына ғылыми қауымдастық өкілдері, мемлекеттік органдар, қоғамдық ұйымдар, жастар бірлестіктері, студенттік қауымдастық мүшелері, медиаторлар және Аналар кеңесінің өкілдері қатысты.
Іс-шара барысында инклюзивті университеттік ортаны қалыптастыру, кемсітушілік пен буллингтің алдын алу, өзара құрмет пен толеранттылық мәдениетін дамыту, сондай-ақ жастар арасында гендерлік теңдік қағидаттарын ілгерілету мәселелері талқыланды. Дөңгелек үстел аясында медиация мәселелеріне ерекше назар аударылды. Білім беру ортасында медиативтік тәсілдерді дамыту диалог мәдениетін нығайтуға, жанжалды жағдайлардың алдын алуға, жастардың сындарлы қарым-қатынас және дауларды бейбіт жолмен шешу дағдыларын қалыптастыруға ықпал ететіні атап өтілді. Сонымен қатар, Аналар кеңесінің өскелең ұрпақты тәрбиелеу, отбасылық құндылықтарды нығайту, теңдік, құрмет және әлеуметтік әділеттілік мәселелеріне жауапкершілікпен қарауды қалыптастырудағы маңызды рөлі айтылды. Пікірталас алаңында қатысушылар инклюзивті білім беруді дамытудағы халықаралық тәжірибені, теңдік мәдениетін қалыптастырудағы жастар бастамалары мен медианың рөлін, сондай-ақ гендерлік тұрғыдан сезімтал білім беру саясатын дамытудың заманауи тәсілдерін талқылады. Дөңгелек үстел қорытындысы бойынша қатысушылар инклюзивтілік, қоғамдық келісім және тең мүмкіндіктер мәдениеті қағидаттарын нығайтуға бағытталған бірлескен білім беру, ғылыми және қоғамдық бастамаларды жүзеге асыруда алдағы уақытта да ынтымақтастықты жалғастыруға дайын екендіктерін білдірді.
