Қарағанды облысының Достық үйінде Қазақстан халқы Ассамблеясының 30 жылдығы мен Алғыс күніне арналған «Адамгершілік – асыл қасиет» атауымен облыстық форумы өтті.
Іс-шараға Қазақстан халқы Ассамблеясының облыс мүшелері, этномәдени бірлестіктердің өкілдері, қоғам қайраткерлері, ардагерлер, азаматтық қоғам өкілдері, қала және ауданның онлайн қосылған өкілдері қатысты.
Форум басталмас бұрын «Қазақстан халқы Ассамблеясына 30 жыл» ескерткіш тақтасының ашылу салтанаты өтті.
Одан соң форум жұмысы басталып, қатысушылар Қазақстан Республикасының Мемлекеттік Ән ұранын орындады. Әнұран барлық өңірлерде бір мезгілде орындалды.
Қазақстан халқы Ассамблеясының өңірдегі төрағасы, облыс әкімі Е.Қ.Бөлекпаев Мемлекет басшысының құттықтау хатын оқыды. Содан соң облыс әкімі өз құттықтау сөзінде Алғыс күніне орай өткен «Ақсақалдар кеңесі» Республикалық форумының қоғамдық және азаматтық сектор тарапынан жоғары бағаланғанын атап өтіп, осындай іс-шараларды тұрақты түрде өткізу қажеттігін тапсырды.
Қазақстан халқы Ассамблеясының өңірлік белсенділері облыс әкімінің Алғыс хаттарымен марапатталды.
Форум аясында Ассамблея мүшелері «Қайырымдылық керуені» атты қайырымдылық акциясының бастау алғаны туралы жария етті, оған барлық облыс аудандары мен өңірлерінен этномәдени бірлестіктердің өкілдері қосылды.
Қарағанды облысының корей этномәдени бірлестігінің төрайымы, Қазақстан халқы Ассамблеясының мүшесі Лилия Михайловна Ким «Қайырымдылық керуені» акциясы аясында Қарағанды құрылыс-техникалық колледжінің 4-курс студенті Исайын Мұхаметәлі Серікболұлына әлем чемпионатында өнер көрсету үшін демеушілік көмек көрсетілетінін хабарлады.
Балқаш қаласының Аналар кеңесінің төрайымы Альмира Қалқаманқызы Мусина «Қайырымдылық керуені» акциясын толық қолдайтынын айтып, іс-шара аяқталған соң Балқаш қаласының Аналар кеңесінің өкілдері қаладағы перзентханаларды аралап, Алғыс күні туған балаларды құттықтайтынын жеткізді.
Әр түрлі саланың өкілдеріне алғыс сөздері айтылды.
«Өмір тынысы» қоғамдық бірлестігі трансплантацияланған науқастардың төрағасы Жәнібек Зейнелұлы Успанов донорларға адамдардың өмірін сақтауға қосқан баға жетпес үлестері үшін алғыс білдірді.
Донорлар мен донорлық органдарды алған адамдар өздерінің тарихтарымен бөлісті.
Нұра ауданының «Шахтерское» ЖШС автопаркінің бастығы Асылбек Қасымұлы Рахымбеков өз ұстаздарынан алған баға жетпес тәжірибелері үшін алғыс айтты. Этномәдени бірлестіктердің жетекшілері Қазақстан халқының әртүрлі тарихи кезеңдердегі қонақжайлығы үшін алғыс айтты.
«Вайнах» шешен-ингуш этномәдени бірлестігінің төрағасы Джанаев Увайс Хаважиевич этномәдени бірлестіктердің барлық басшыларының атынан тарихтың әртүрлі кезеңдеріндегі қонақжайлылығы үшін қазақ халқына алғыстарын білдірді.
Қарағанды өңірінде Алғыс айту күніне арналған 100-ден астам іс-шара өткізіледі.
