Достық үйінде 10 сәуір 2025 жылы Қазақстан халқы Ассамблеясының Ақсақалдар кеңесі және мемлекеттік органдар мен азаматтық қоғам институттарының қолдауымен Қазақстан халқы Ассамблеясының 30 жылдығы аясында «Бейбітшілік пен келісім туралы ақсақал тағылымы» республикалық тақырыптық күні өткізілді.
Шараға ҚХА Ақсақалдар кеңесінің мүшелері — әзірбайжан «НАМУСКZ» ұлттық мәдени орталығының басшысы Г.Рзаев, Қарағанды облыстық маслихатының депутаты, «Аманат» партиясының мүшесі, кәсіпкер В.Жабяк, Қарағанды облысы кәсіпкерлер қауымдастығының төрағасы М.Санаубаев, ҚР ІІМ Қарағанды облысының Полиция департаментінің ӘПБ аға уәкілетті өкілі, полиция капитаны Қ.Әлкенов, сонымен қатар жергілікті мемлекеттік органдардың өкілдері, азаматтық қоғам институттары, ғалымдар, сарапшылар, жастар, бұқаралық ақпарат құралдарының өкілдері қатысты.
Шара аясында «Неліктен Қазақстан халқы бейбітшілік пен бірлікте өмір сүруде?» атты дәріс өткізілді.
Дәрісті ақсақалдар, қоғам қайраткерлері және сарапшылар жүргізіп, олар бейбітшілік, бірлік және этносаралық келісім мәселелері бойынша баяндамалар мен талдамалық материалдарды ұсынды.
Қазақстан халқы Ассамблеясының 30 жылдық қызметінің нәтижелері мен оның этносаралық келісімді нығайтуға қосқан үлесіне айрықша назар аударылды.
Талқылаудың маңызды бөлігі – елдегі бірлікті сақтаудағы жастар бастамалары мен қоғамдық жобалардың ықпалын талдау болды.
Дәріс барысы интерактивті пікірталастармен, сұрақ-жауап сессияларымен және этносаралық келісімді нығайтудағы табысты тәжірибелерді талқылаумен толықтырылды.
