Новости Республики

ТЖМ: Газ баллондар мен газ жабдықтарын қалай пайдалану керек

Газ және газбен жабдықтау саласындағы уәкілетті органдардың құзыреті

Жиын Төтенше жағдайлар вице-министрі Мереке Пішембаев қазіргі уақытта тұрғын үйлерде газ тұрмыстық баллондардың жиі жарылыстарына, газ-ауа қоспасының тұтануына байланысты газ жабдығын қауіпсіз пайдалану мәселесі өзекті екенін айтып өтті. Осы орайда, газ және газбен жабдықтау саласындағы қоғамдық қатынастардың құқықтық, экономикалық және ұйымдастырушылық негіздері «Газ және газбен жабдықтау туралы» Заңмен реттеледі. Заңда газ және газбен жабдықтау саласындағы мемлекеттік уәкілетті органдардың құзыреттері нақты баяндалған және олардың өкілеттіктері бөлінген. Сондай-ақ, бақылау объектілері газды сатып алу мақсаттарына қарай нақтыланған. Атап айтқанда:

- Заңға сәйкес ТЖМ-ге газбен жабдықтау жүйелері объектілерінің қауіпсіздігі бойынша талаптарды белгілеу және өнеркәсіптік кәсіпорындар мен ұйымдардың оларды сақтауына мемлекеттік бақылауды жүзеге асыру бойынша өкілеттіктер жүктелген;

- Заңның 6-бабында газ және газбен жабдықтау саласындағы мемлекеттік саясатты іске асыруды қамтамасыз ететін және газбен жабдықтау жүйелерінің жұмыс істеуі мен дамуына, тауарлық, сұйытылған мұнай газын және табиғи газды өткізу жағдайларына, газды тасымалдау, сақтау, өткізу және есепке алу талаптарына мемлекеттік бақылауды жүзеге асыратын, газ желісі ұйымдарын аккредиттеуді жүргізетін Энергетика министрлігі тұлғасындағы уәкілетті органның құзыреті айқындалған;

- Заңмен Әкімдіктердің тұрмыстық баллондар мен газбен жабдықтау жүйелерінің объектілерін, тұрмыстық және коммуналдық-тұрмыстық тұтынушылардың газ тұтыну жүйелері мен газ жабдығын қауіпсіз пайдалану талаптарының сақталуына мемлекеттік бақылауды жүзеге асыру құзыреті белгіленген.

Бұдан бөлек, ӘҚБтК-нің 729-бабына сәйкес жергілікті атқарушы органдар тұрмыстық және коммуналдық-тұрмыстық тұтынушылардың газ тұтыну жүйелері мен газ жабдығын пайдалану қауіпсіздігі жөніндегі талаптарды бұзғаны үшін әкімшілік құқық бұзушылық туралы істерді қарайды.

Газбен жабдықтау объектілерінде қанша бұзушылық тіркелді

Вице-министрдің мәліметінше, ағымдағы жылдың 10 айында өнеркәсіптік қауіпсіздік комитетінің аумақтық бөлімшелерінің мемлекеттік инспекторлары газбен жабдықтау объектілеріне 103 тексеру, оның ішінде кесте негізінде ерекше тәртіп бойынша 66 тексеру және жоспардан тыс 37 тексеру жүргізілген. Нәтижесінде 1053 бұзушылық анықталған.

«Заңнама талаптарын бұзғаны үшін 13 жеке және 63 заңды тұлғаларға қатысты 76 әкімшілік құқық бұзушылық туралы іс қозғалды. Жалпы сомасы 9 миллион теңгеден астам айыппұл салу түрінде әкімшілік жауапкершілікке тартылды», - деді Мереке Пішембаев.

Сондай-ақ, вице-министр үкімет отырысының 2020 жылғы 3 қарашадағы хаттамалық тапсырмасын орындау үшін Министрлік республиканың барлық өңірлерінде газ техникалық инспекцияларын құруға бағытталған ұйымдастыру іс-шараларына белсенді қатысқанын айтып өтті. Тиісті бақылауды қамтамасыз ету және жергілікті атқарушы органдарға көмек көрсету мақсатында тұрақты негізде түсіндіру жұмыстары жүргізілетінін жеткізді.Соның ішінде, газ және газбен жабдықтау саласындағы заңнама талаптарының сақталуын бақылауды құру және жүзеге асыру мәселелерінде жергілікті атқарушы органдардың тұрғын үй инспекцияларын әдістемелік көмек және үйлестіру көрсетілетінін айтты.

Газ жабдықтарын қауіпсіз пайдалану қағидаларын түсіндіру жұмыстары

Оның айтуынша, ағымдағы жылғы 15 қыркүйекте Министрлік төтенше жағдайлардың алдын алу және оларды жою жөніндегі ведомствоаралық мемлекеттік комиссияның отырысын өткізген. Онда мүдделі органдармен бірлесіп газбен жабдықтау жүйелерінің, газ тұтыну жүйелерінің және газ жабдығының объектілерімен байланысты төтенше жағдайлардың алдын алуға бағытталған нақты міндеттер мен іс-шаралар айқындалған.

«Ағымдағы жылы Министрліктің аумақтық департаменттерінің қызметкерлері өңірлер әкімдіктерімен бірлесіп 953 аралау жүргізді. Бірлескен іс-шаралар барысында екі мыңнан астам жадынамалар мен өзге де ақпараттық материалдарды халыққа және газ өткізетін кәсіпорындарға хабарлау және тарату ұйымдастырылды», - деді вице-министр.

Сондай-ақ, ол республиканың газбен жабдықтау жүйелері объектілеріндегі авариялардың алдын алу мақсатында ТЖМ газбен жабдықтау жүйелері объектілеріндегі аварияларды тексерудің барлық материалдарын аумақтық бөлімшелерге, облыстардың қалалары мен аудандарының ЖАО-мен газ және газбен жабдықтау саласындағы қызметті жүзеге асыратын ұйымдар басшыларының жауапкершілігін қалыптастыру бойынша бірлескен жұмысты ұйымдастыру үшін жіберілетінін айтып өтті.

Елімізде газбен улану, баллонның жарылуы салдарынан қанша жағдай тіркелді

Мереке Пішембаев қабылданып жатқан шараларға қарамастан, жыл сайын елімізде жарылыстар, шапалақтар, газ-ауа қоспасының тұтануы орын алатынын жеткізді .Мәселен, ағымдағы жылдың 16 қарашасында Ақмола облысының Шортанды кентінде қайғылы оқиға орын алған.

«Бір қабатты 3 пәтерлі үйде (қалқанды) 350 шаршы метр алаңда тұрмыстық газ баллонының жарылуы және пәтер шатырының құлауы орын алды. Өрт болған жерден 2 әйел мен 1 баланың денесі табылды, 10 адам күйік шалған ауруханаға жатқызылды, оның ішінде 5 бала», - деді ол.

Сонымен қатар, Министрлікке келіп түскен ақпарат бойынша еліміздің әлеуметтік инфрақұрылым объектілерінде бүгінгі таңда 55 жағдай (2020 жылы – 67 жағдай), газ-ауа қоспасының тарсылдауы мен тұтануы, тұрмыстық баллондардың жарылуы және газбен улану тіркелген. Нақтырақ айтқанда, 33 газ-ауа қоспасы тарсылдауы, 16 тұрмыстық баллондардың жарылуы, газбен улану, онда 86 адам зардап шеккен.

«Газ-ауа қоспасының жарылыстарының, тарсылдауының және тұтануларының 55 жағдайының 36-сы тұрмыстық баллондарды пайдаланумен және немесе олардың ақауымен байланысты», - деді вице-министр.

Баллондардың авариясына байланысты өзекті мәселелер қандай

Оның айтуынша, қазіргі таңда қалыптасқан тұрмыстық газ баллондарының айналым тетігін және онымен байланысты процестерді (май құю, тасымалдау, көп мәрте қолдану және пайдаланудан шығару (есептен шығару, кәдеге жарату)) талдау баллондардың авариясымен байланысты көптеген проблемаларды көрсететінін айтып өтті. Олардың ең өзектісі мыналар болып табылады:

- елде халық пайдаланатын ескі және мерзімі өткен баллондардың көп болуы, оларды толтыру заңсыз жүзеге асырылады;

- баллондар паркінің қартаю үрдісі;

- айналымдағы баллондардың иесіздігі және оларды есепке алудың болмауы;

- баллондарды заңсыз толтыратын газ компанияларының қызметі;

- баллондарды толтыру және пайдалану процесінде қауіпсіздік талаптарын елемеу.

Сондай-ақ, ол газды халыққа сататын компаниялар газды қайта сатуды ғана емес, сонымен қатар баллондарды тексеруді және жөндеуді жүзеге асыратынын айтып өтті. Оның сөзінше, әдетте бос баллондарды толтырылған баллондарға айырбастауды қолданады. Баллонды айналымнан шығару бұл газ компаниясының тікелей шығындары және бұл компаниялар мерзімі өткен және ақаулы баллондарды айналымнан шығаруға экономикалық тұрғыдан мүдделі еместігін жеткізді.

«Қауіпсіздікке алаңдайтын тұтынушылар – азшылық. Тұтынушылардың көпшілігі өздерінің кеңестік баллондарын жақын маңдағы АГҚС-ға құяды, олар тұрмыстық баллондарды құюға құқылы емес, алайда олар жаппай заңсыз түрде айналысады және «клиенттің ыдысына құюды қолданады», - деді ол.

Қайғылы оқиғалардың себептерінің бірі газ және газбен жабдықтау саласындағы заңнамада көзделген жергілікті атқарушы органдардың газ техникалық инспекцияларының бақылау функцияларын тиісті деңгейде жүзеге асыруы болып табылады.

Газ баллондар мен газ жабдықтарын пайдалану қағидалары

Желтоқсан және жаңа жылдық мерекелер қарсаңында ТЖМ азаматтарды тұрмыстық газ баллондар мен газ жабдықтарын пайдалану қағидаларын сақтауға кеңес береді.

- Газ баллонын қосар алдында газдың кемуін тексеру, қысым реттегішінің (редуктордың) жай-күйін тексеру, ашық отты пайдаланбау, темекі шегу, газ иісі болған кезде электр аспаптарын қосу және ажырату;

- Газ тұрмыстық баллондарды жылыту және жылыту аспаптарының (пештердің, жылыту радиаторларының) жанында орналастыруға жол бермеу;

- Автогаз құю станцияларында тұрмыстық газ баллондарын толтырмауға, өйткені бұл тұрмыстық баллондар мен газбен жабдықтау жүйелері объектілерін қауіпсіз пайдалану талаптарына қайшы келеді;

- Сізге тиесілі газ жабдығына техникалық қызмет көрсетуге заңда көзделгендей, тұрмыстық баллондарда сұйытылған мұнай газын бөлшек саудада өткізуді жүзеге асыратын газ желісі ұйымымен немесе газ толтыру пунктінің иесімен ғана шарттар жасасуға сұраймын;

«Газ аспаптарын, оның ішінде тұрмыстық газ баллондарын пайдалану кезінде қауіпсіздікті қамтамасыз ету өмір, денсаулық, сондай-ақ сіздің мүлкіңіздің сақталуының кепілі болып табылады», - деді вице-министр.

Бұдан бөлек, ол автогаз құю станцияларының иелеріне тұрмыстық газ баллондарын толтыруға жол бергені үшін әкімшілік жауапкершіліктің бар екенін және станцияларда осындай фактілерге жол бермеу туралы ақпараттық стендтерді орналастыру қажеттігін айтты. Ал газ толтыру станциялары мен пункттерінің иелеріне тұрмыстық газ баллондарын, оның ішінде теріс температура кезеңінде пайдалану қағидалары бойынша тұтынушыларға нұсқама жүргізу қажеттігі туралы нұсқама беруді ескертті.

Вернуться к списку новостей


Мемлекеттік қызмет көрсетудің сапасын қалай бағалайсыз?
Мұрағат
Қарағанды облысы ішкі саясат басқармасының "Қоғамдық келісім" КММ
Разработка и поддержка сайта: Интернет компания «Creatida»
Яндекс.Метрика
Рейтинг@Mail.ru